ராணிப்பேட்டை அருகே விசிக பிரமுகர் சிவகுமார் நடுரோட்டில் வெட்டிப் படுகொலை

ராணிப்பேட்டை: மாவட்டம் கலவை அருகே விடுதலைச் சிறுத்தைகள் கட்சியின் முன்னணிப் பிரமுகர் ஒருவர் மர்மக் கும்பலால் நடுரோட்டில் வெட்டிப் படுகொலை செய்யப்பட்ட சம்பவம் பெரும் அதிர்ச்சியையும் பதற்றத்தையும் ஏற்படுத்தியுள்ளது.

ராணிப்பேட்டை மாவட்டம் கலவை வட்டம் நாகலாவி கிராமத்தைச் சேர்ந்தவர் சிவகுமார். இவர் அப்பகுதியில் விடுதலைச் சிறுத்தைகள் கட்சியின் தீவிரப் பிரமுகராகவும், களப்பணியாளராகவும் செயல்பட்டு வந்தார்.

சிவகுமார் தனது தனிப்பட்ட பணிக்காக இருசக்கர வாகனத்தில் ஆற்காடு-கலவை பிரதான நெடுஞ்சாலையில் அல்லாளச்சேரி பகுதி அருகே சென்று கொண்டிருந்தார். அப்போது ஆள்நடமாட்டம் குறைவாக இருந்த இடத்தில், காரிலும் இருசக்கர வாகனங்களிலும் பின்தொடர்ந்து வந்த மர்மக் கும்பல் திடீரென அவரது வாகனத்தை வழிமறித்தது.

சிவகுமார் சுதாரிப்பதற்குள் வீச்சரிவாள் உள்ளிட்ட பயங்கர ஆயுதங்களுடன் பாய்ந்த அந்தக் கும்பல், அவரைத் தலை, கழுத்து உள்ளிட்ட இடங்களில் சரமாரியாக வெட்டித் தள்ளியது. பலத்த வெட்டுக் காயங்களுடன் ரத்த வெள்ளத்தில் சாலையில் விழுந்த சிவகுமார், உயிருக்குப் போராடி சம்பவ இடத்திலேயே துடிதுடித்து உயிரிழந்தார்.

சிவகுமார் உயிரிழந்ததை உறுதி செய்துகொண்ட பின்னர் அந்த மர்மக் கும்பல் மின்னல் வேகத்தில் அங்கிருந்து தப்பி ஓடிவிட்டது. தகவலறிந்து வந்த போலீசார் உடலைக் கைப்பற்றி பிரேதப் பரிசோதனைக்கு அனுப்பி வைத்தனர்.

கொலைக்கான காரணம் குறித்து போலீசார் தீவிர விசாரணை நடத்தி வருகின்றனர். முன்விரோதம் காரணமாக இந்தக் கொலை நடந்ததா என்ற கோணத்திலும் விசாரணை நடைபெறுகிறது. தப்பியோடிய கும்பலைப் பிடிக்க தனிப்படை அமைக்கப்பட்டுள்ளது.