சிறுவர்களுக்கு கஞ்சா விற்கக் காத்திருந்த 2 வாலிபர்கள் கைது: பெரம்பலூரில் பரபரப்பு

பெரம்பலூர்: சிறுவர்களுக்கு கஞ்சா விற்பனை செய்யக் காத்திருந்த 2 வாலிபர்களை போலீசார் கைது செய்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

பெரம்பலூர் மாவட்டம் அடைக்கம்பட்டி அருகே உள்ள கண்ணப்பாடி வனப்பகுதியில், 2 வாலிபர்கள் சிறுவர்களுக்கு கஞ்சா விற்பனை செய்யக் காத்திருந்தனர். அப்போது ரோந்து சென்ற சப்-இன்ஸ்பெக்டர் அசோகன் தலைமையிலான போலீசார் அவர்கள் இருவரையும் மடக்கிப் பிடித்து சோதனை செய்தனர்.

சோதனையில் அவர்களிடம் 50 கிராம் கஞ்சா இருப்பது தெரியவந்தது. விசாரணையில் அவர்கள் டி.களத்தூர் தென்றல் நகரைச் சேர்ந்த கண்ணபிரான் மகன் ஸ்டாலின் (23), கலையரசன் மகன் சூர்யா (23) என்பது தெரியவந்தது.

வழக்குப்பதிவு செய்த போலீசார், இருவரையும் நீதிமன்றத்தில் ஆஜர்படுத்தி பெரம்பலூர் சிறையில் அடைத்தனர்.

சிறுவர்களுக்கு கஞ்சா விற்பனை செய்யும் சம்பவங்கள் அடுத்த தலைமுறையினரை போதைக்கு அடிமையாக்கி சீரழிக்கும் என்பதால் இச்சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. கஞ்சா விற்பனையாளர்கள் மீது கடும் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.