காலி பாட்டில் திட்டத்துக்கு எதிர்ப்பு: டாஸ்மாக் பணியாளர்கள் கடையடைப்பு போராட்டம் — பத்துக்கும் மேற்பட்டோர் பணியிடை நீக்கம்
காலி மதுபாட்டில்களைத் திரும்பப் பெறும் புதிய நடைமுறையை எதிர்த்து டாஸ்மாக் பணியாளர்கள் நேற்று தமிழகம் முழுவதும் பெரும்பாலான கடைகளை மூடிப் போராட்டத்தில் ஈடுபட்டனர். மாவட்ட மேலாளர் அலுவலகங்கள் முற்றுகையிடப்பட்ட நிலையில், போராட்டத்தில் ஈடுபட்ட பத்துக்கும் மேற்பட்டோரைப் பணியிடை நீக்கம் செய்துள்ளதாக அமைச்சர் விக்னேஷ் தெரிவித்துள்ளார்.

தமிழகத்தில் தற்போது 4,048 டாஸ்மாக் மதுபான சில்லறை விற்பனைக் கடைகள் செயல்பட்டு வருகின்றன. இந்தக் கடைகளில் நாள்தோறும் சராசரியாக ரூ.150 கோடி அளவுக்கும், வார இறுதி நாள்களில் ரூ.200 கோடி வரையும் விற்பனை நடைபெறுவது வழக்கம்.
இந்நிலையில், நவம்பர் 1-ம் தேதி முதல் டாஸ்மாக் நிர்வாகம் புதிய நடைமுறைகளை அமல்படுத்தியது. ரூ.ஆயிரத்துக்கு மேற்பட்ட விற்பனைகளுக்கு ரொக்கப் பணம் பெறக்கூடாது; அட்டை அல்லது மின்னணுப் பரிவர்த்தனை மட்டுமே மேற்கொள்ள வேண்டும் என உத்தரவிடப்பட்டது. காலி பாட்டில் திரும்பப் பெறும் திட்டத்திலும் மாற்றம் செய்யப்பட்டு, ஒவ்வொரு மதுபாட்டிலுக்கும் விலையுடன் கூடுதலாக ரூ.10 சுற்றுச்சூழல் மற்றும் சுகாதார மேல் வரி சேர்த்து, அதைப் பாட்டிலிலேயே அச்சிட்டு விற்பனை செய்யும் முறை அமலுக்கு வந்தது. எடுத்துக்காட்டாக, ரூ.140-க்கான ஒரு குவாட்டர் பாட்டிலுக்குக் கூடுதலாக ரூ.10 என மொத்தம் ரூ.150 பெறப்படும்; காலி பாட்டில்களைத் திருப்பிக் கொடுப்போருக்கு மட்டும் அந்தக் கூடுதல் ரூ.10 திருப்பித் தரப்படும் என டாஸ்மாக் நிர்வாகம் உத்தரவிட்டிருந்தது. காலி பாட்டில்களைத் திரும்பப் பெற தனியங்கி இயந்திரம் அறிமுகப்படுத்தப்பட உள்ளதாகவும், அதுவரை காலி பாட்டில்களைத் திருப்பிக் கொடுப்போரிடம் ரூ.10-ஐத் திருப்பித் தர வேண்டும் எனவும் நிர்வாகம் தெரிவித்திருந்தது.
இந்த நடைமுறைகளுக்கு எதிர்ப்பு தெரிவித்து, டாஸ்மாக் பணியாளர்கள் நேற்று தமிழகம் முழுவதும் பெரும்பாலான கடைகளை மூடிக் கடையடைப்பு போராட்டத்தில் ஈடுபட்டனர். சென்னை, திருவள்ளூர், கிருஷ்ணகிரி, தேனி மாவட்டங்களில் அனைத்துக் கடைகளும் மூடப்பட்டன. இதனால் மதுப்பிரியர்கள் ஏமாற்றம் அடைந்தனர்; திறக்கப்பட்ட ஒரு சில கடைகளில் கூட்டம் அலைமோதியது. கடைகள் மூடப்பட்டிருந்த நிலையிலும், ஒரு சில இடங்களில் பார்கள் மூலம் கள்ளத்தனமாக மது விற்கப்பட்டது; சைதாப்பேட்டை பகுதியில் சட்டவிரோதமாக விற்பனை செய்யப்பட்ட பாரில் காவல்துறையினர் சோதனை செய்து 140 மது பாட்டில்களைப் பறிமுதல் செய்தனர்.
சென்னை மண்டலத்தில் உள்ள அனைத்துக் கடைப் பணியாளர்களும் அம்பத்தூரில் உள்ள மண்டல மேலாளர் அலுவலகத்தை முற்றுகையிட்டனர். இதேபோல, திருவள்ளூர் கிழக்கு மாவட்டப் பணியாளர்கள் மாவட்ட மேலாளர் அலுவலகத்தை முற்றுகையிட்டுப் போராட்டத்தில் ஈடுபட்டனர்.
காலி பாட்டில் திட்டத்துக்கு ஒரு குறியீடு ஸ்கேன் செய்ய வேண்டும் என்றும், காலி பாட்டில் திரும்பப் பெற மாற்றுப் பணியாளர்களை நியமிப்பதாகக் கடந்த ஆகஸ்ட் மாதமே கூறிய நிலையில் தற்போது கடைப் பணியாளர்களையே அந்தப் பணியில் ஈடுபடுத்துவதாகவும் போராட்டத்தில் ஈடுபட்டவர்கள் தெரிவித்தனர். இதனால் பணிச்சுமை கூடுவதோடு, கூட்டம் அதிகம் இருக்கும் நேரங்களில் பிரச்சினை ஏற்படுகிறது என்றும் அவர்கள் கூறினர். மேலும், டாஸ்மாக் நவீனமயமாக்கல் காரணமாக ஒரு மது பாட்டிலை விற்கும் போது இரண்டு முறை குறியீடுகளை ஸ்கேன் செய்ய வேண்டியுள்ளதாகவும் பணியாளர்கள் தெரிவித்தனர்.
இது குறித்து அமைச்சர் விக்னேஷ் கூறுகையில், காலி பாட்டில் திரும்பப் பெறும் திட்டத்தில் தொகை முழுவதும் கணக்கில் வைக்கப்பட வேண்டும் என்பதற்காகவே இந்த நடைமுறை கொண்டுவரப்பட்டதாகவும், பணியாளர்களுக்கு ஊதிய உயர்வு மற்றும் பிற கோரிக்கைகள் அனைத்தையும் நிறைவேற்றியுள்ளதாகவும் தெரிவித்தார். ஆனாலும் பணியாளர்கள் போராட்டத்தில் ஈடுபட்டுள்ளனர் என்றும், அவர்கள் மீது கடும் நடவடிக்கை எடுக்க அதிகாரிகளுக்கு அறிவுறுத்தப்பட்டுள்ளது என்றும், பத்துக்கும் மேற்பட்டோரைப் பணியிடை நீக்கம் செய்துள்ளதாகவும் அவர் தெரிவித்தார்.
இந்தச் செய்தியைப் பகிருங்கள்
தொடர்புடைய கட்டுரைகள்

தி.மு.க. தலைவர் குறித்து கேலி, கிண்டல் பதிவு — த.வெ.க. தகவல் தொழில்நுட்ப அணி மீது சென்னை காவல் ஆணையரிடம் தி.மு.க. புகார்
த.வெ.க. அரசைக் கண்டித்து இன்று (31-10-2026) தமிழ்நாடு முழுவதும் தி.மு.க. மகளிர் அணி சார்பில் நடைபெறும் கண்டன ஆர்ப்பாட்டம் குறித்து, தி.மு.க. தலைவர் மு.க. ஸ்டாலின் காணொலி பதிவின் வாயிலாக அழைப்பு விடுத்திருந்தார். அதனை த.வெ.க.வின் அதிகாரபூர்வ தகவல் தொழில்நுட்ப அணியின் சமூக வலைத்தளத்தில் கேலியும் கிண்டலும் செய்யும் வகையில் விஷமத்தனமான கருத்துகளை பதிவேற்றம் செய்து, ஸ்டாலினின் புகழுக்கும் பெயருக்கும் களங்கம் விளைவித்ததாகக் கண்டித்து, தி.மு.க. சார்பில் இன்று சென்னை பெருநகர காவல்துறை ஆணையரிடம் புகார் மனு அளிக்கப்பட்டுள்ளது.
· 1 நிமிட வாசிப்பு

சட்டம் ஒழுங்கு பிரச்சினைகளைத் திசை திருப்ப தவெக அரசு முயற்சி — விஜய் ஆட்சிக்கு வந்ததிலிருந்து மக்களால் ஒரு பைசா கூட சேமிக்க முடியவில்லை; இது கேலிக் கூத்தான அரசு என்றார் ஆர். எஸ். பாரதி
சட்டம் ஒழுங்கு சீர்கேடு, பெண்கள், குழந்தைகள் பாதுகாப்பின்மை, விலைவாசி உயர்வு ஆகிய பிரச்சினைகளில் இருந்து கவனத்தைத் திசை திருப்பவே தவெக அரசு தி.மு.க.வினர் மீது நடவடிக்கை எடுப்பதாக தி.மு.க. அமைப்புச் செயலாளர் ஆர். எஸ். பாரதி குற்றஞ்சாட்டியுள்ளார். விஜய் ஆட்சிக்கு வந்ததிலிருந்து மக்களால் ஒரு பைசா கூட சேமிக்க முடியவில்லை என்றும், இது கேலிக் கூத்தான அரசு என்றும் அவர் தெரிவித்துள்ளார்.
· 1 நிமிட வாசிப்பு

பசும்பொனில் ஸ்டாலின் பேட்டி: த.வெ.க. ஆட்சிக்கு பூஜ்ஜியம் மதிப்பெண்
பசும்பொன் முத்துராமலிங்கத் தேவர் குருபூஜையையொட்டி, மதுரை கோரிப்பாளையத்தில் உள்ள அவரது சிலைக்கும் பசும்பொனில் உள்ள நினைவிடத்திலும் மரியாதை செலுத்திய தி.மு.க. தலைவர் மு.க. ஸ்டாலின், செய்தியாளர்களிடம் த.வெ.க. அரசின் ஐந்து மாத ஆட்சிக்கு பூஜ்ஜியம் மதிப்பெண் அளித்தார். சினிமா கதாநாயகனை நம்பி வாக்களித்த மக்கள் இன்று ஏமாற்றத்தில் இருப்பதாகவும், விலைவாசி உயர்வும் சட்டம் ஒழுங்கு சீர்கேடும் மக்களை வாட்டுவதாகவும் அவர் குற்றஞ்சாட்டினார்.
· 1 நிமிட வாசிப்பு

"வேக்-அப் கால்": மகளிர் அணி ஆர்ப்பாட்டம் த.வெ.க. அரசுக்கு எச்சரிக்கை என ஸ்டாலின்
சொந்த புத்தியும் இல்லாமல், சொல் புத்தியும் இல்லாமல் சட்டம் ஒழுங்கைச் சீரழித்துவிட்ட சோப்ளாங்கி த.வெ.க. அரசு என்று தி.மு.க. தலைவர் மு.க. ஸ்டாலின் தனது எக்ஸ் பதிவில் விமர்சித்துள்ளார். நாளை தி.மு.க. மகளிர் அணி நடத்தவுள்ள ஆர்ப்பாட்டம், தறிகெட்டு ஓடும் த.வெ.க. அரசுக்கான வேக்-அப் கால் என்றும் அவர் கூறியுள்ளார்.
· 1 நிமிட வாசிப்பு

