நெல்லை கல்லிடைக்குறிச்சியில் திருமண மண்டப உரிமையாளர் கொலை: 2 பேர் கைது

திருநெல்வேலி: கல்லிடைக்குறிச்சியில் திருமண மண்டப உரிமையாளர் 4 பேர் கும்பலால் படுகொலை செய்யப்பட்ட சம்பவம் பரபரப்பை ஏற்படுத்தியுள்ளது. இது தொடர்பாக 2 பேரை தனிப்படை போலீசார் கைது செய்துள்ளனர்.

கொலை செய்யப்பட்டவர் கண்ணன். இவரது உடலை மீட்ட போலீசார் பிரேதப் பரிசோதனைக்காக திருநெல்வேலி அரசு மருத்துவமனைக்கு அனுப்பி வைத்தனர். கண்ணனின் உறவினர்கள் கல்லிடைக்குறிச்சி காவல் நிலையத்தில் புகார் அளித்தனர்.

புகாரின் பேரில் போலீசார் வழக்குப்பதிவு செய்து விசாரணை மேற்கொண்டனர். கொலை நடந்த பகுதியில் பொருத்தப்பட்டிருந்த கண்காணிப்பு கேமரா காட்சிகளைக் கைப்பற்றி போலீசார் ஆய்வு செய்தனர்.

கேமரா காட்சிகளின் அடிப்படையில் விசாரித்ததில், தலைமறைவாக இருந்த 4 பேரில் வெங்கடேஷ், சூர்யா இசக்கி ஆகிய 2 பேரை போலீசார் கைது செய்துள்ளனர். மற்ற இருவரையும் போலீசார் தீவிரமாகத் தேடி வருகின்றனர்.

கொலைக்கான காரணம் குறித்து கைதானவர்களிடம் போலீசார் தீவிர விசாரணை நடத்தி வருகின்றனர். முன்விரோதம் காரணமாக இந்தக் கொலை நடந்ததா என்ற கோணத்தில் விசாரணை நடைபெறுகிறது.