உரிமம் இன்றி அரசுப் பேருந்தை ஓட்டிய தவெக எம்.எல்.ஏ.: விசாரணைக்கு உத்தரவு

வேலூர்: வேலூர் புதிய பேருந்து நிலையத்தில் 'வெற்றிப் பயணம்' திட்ட தொடக்க விழாவின்போது, கே.வி.குப்பம் தொகுதி தவெக எம்.எல்.ஏ. ஈ. தென்றல் குமார் உரிய ஓட்டுநர் உரிமம் இன்றி தமிழ்நாடு அரசுப் போக்குவரத்துக் கழக பேருந்தை ஓட்டிய சம்பவம் தொடர்பாக போக்குவரத்துத் துறை விசாரணை நடத்த உத்தரவிட்டுள்ளது.

முதல்வர் சி. ஜோசப் விஜய் சென்னை கோயம்பேடு பேருந்து நிலையத்தில் வெள்ளிக்கிழமை இத்திட்டத்தை தொடங்கி வைத்தார். பெண்கள் மற்றும் திருநங்கைகளுக்கு கட்டணமில்லா பேருந்து பயணத்தை விரிவுபடுத்தும் இத்திட்டத்தின் தொடக்க விழா வேலூரிலும் நடந்தது. மாவட்ட ஆட்சியர் பி.எஸ். லீலா அலெக்ஸ் பேருந்துகளை கொடியசைத்து தொடங்கி வைத்தார்.

அதன்பின், எம்.எல்.ஏ. தென்றல் குமார் தாமாக முன்வந்து பேருந்தை ஓட்டினார். பேருந்து நிலைய வளாகத்தில் சுமார் 100 மீட்டர் தூரம் அவர் பேருந்தை ஓட்டிய வீடியோ சமூக ஊடகங்களில் வைரலானது. அப்போது பேருந்தில் சுமார் 30 பயணிகள் இருந்தனர்.

"எம்.எல்.ஏ. ஓட்டிய பேருந்து வேகமாகச் சென்றது பயமாக இருந்தது. பெண்கள், குழந்தைகள் உள்பட பல பயணிகள் பேருந்துக்காக காத்திருந்தனர்" என்று ஒரு பயணி தெரிவித்தார்.

விதிமுறைகளின்படி, கனரக வாகனங்களான பேருந்துகளை ஓட்ட கனரக வாகன ஓட்டுநர் உரிமம் மற்றும் பேட்ஜ் அவசியம். இலகுரக வாகன உரிமம் வைத்திருப்போர் கார், வேன், டிராக்டர் மட்டுமே ஓட்ட முடியும். மோட்டார் வாகனச் சட்டம் 1988-ன்படி, இத்தகைய மீறலுக்கு ஓட்டுநருக்கு ரூ.5,000 அபராதமும், வாகன உரிமையாளருக்கு ரூ.10,000 அபராதமும் விதிக்கப்படும் என்று போக்குவரத்து அதிகாரிகள் தெரிவித்தனர்.